Month: April 2013

Kas Kas by Louise Bennett

By: Louise Bennett

Yuh se me trial now mah?
Dat marga gal winjy
Want put me eena kas-kas
An big lian story

She sen come call me toder day
An wen ah goh me chile
De whole fambly gader roun me
Like I was kerosene ile

Dem sey smaddy tell miss Terry
An she tell her darter
Dat Lou dah walk bout an dah
definate her character

An de smaddy wey tell Miss Terry
Sey smaddy wey know Winjy
Sey Winjy tell dat smaddy an
Dat smaddy mus be me

Wen dem start fe chat yuh se mah
Ah glad i wasn’ ile
For ah hooda mus ketch fire
De way me tempa bwile

Ah plasta me mout pon dem yaw
Ah hooden tek it soh
Dem nevah know sey dat I know
De rightful way it goh.

I hear say Jane sey Imo sey
Dat Amy sey dat Sue
Tel smaddy dat Miss Matty sey
She hear sey Sam beat Lou

Me ongle whisper it to Fan
An she goh fas tell Ju_
Him tell Doan and she pinch tell Vie
An Vie goh tell back Sue

Den Sue ax Matty, and you know
De size o fe har mout
She call fe Winjy name an den
De ole tory bruck out

But Lou sey Sam doan beat har
Him ongle fling a stone
An it meck mistake and soh lick har
An bruck har collar-bone

An weel right t’rough de gate and all
Dem call I hooden look
I doan bizniz wid dem Kas kas
For my life is open book

No Lickle Twang

By: Louise Bennett Coverley

Me glad fi see yuh come back, bwoy,
But lawd, yuh let me dung
Me shame a yuh so till all a
Me proudness drop a grung.

Yuh mean yuh go dah Merica
An spen six whole mont deh,
An come back not a piece better
Dan how yuh did go weh?

Bwoy, yuh no shame? Is so yuh come?
After yuh tan so lang!
Not even lickle language, bwoy?
Not even lickle twang?

An yuh sister what work ongle
One week wid Merican
She talk so nice now dat we have
De jooce fi understan?

Bwoy, yuh couldn improve yuhself!
An yuh get so much pay?
Yuh spen six mont a foreign, an
Come back ugly same way?

Not even a drapes trousiz, or
A pass de riddim coat?
Bwoy, not even a gole teet or
A gole chain roun yuh troat?

Suppose me laas me pass go introjooce
Yuh to a stranger
As me lamented son what lately
Come from Merica!

Dem hooda laugh after me, bwoy!
Me couldn tell dem so!
Dem hooda seh me lie, yuh wasa
Spen time back a Mocho!

No back-answer me, bwoy – yuh talk
Too bad! Shet up yuh mout!
Ah doan know how yuh an yuh puppa
Gwine to meck it out.

Ef yuh waan please him, meck him tink
Yuh bring back someting new.
Yuh always call him ‘Pa’ – dis evenin
When him comes seh ‘Poo’.